ملف البلدية و الشؤون الاجتماعية في بريكة barika


من أنــا ، شكون أنا ، Who I Am أنا واحد من أولاد بريكة لمهمشين ، حقرونا صحاب الرشوة ، لوكان مخفتش من ربي و من دعوة الوالدين راني قطعت ديبلومي ، ماقدرتش نعيش في بريكة هربت لسطيف setif و هي مدينة نظيفة و عبادها نظاف متربييـن و اليوم الحمد لله راني متهني مع والدتي و والدي و خاوتي صغار ، بصح منخبيش عليكم راني متوحش بريكة خطراكش زدت فيها و خطراكش فيها كثير من اولاد لفاميليا لـي راههم محقورين و متحملين الذل و صامتين خطراكش متربيين ، بصح على جالهم راني كل أسبوع نروح لبريكة و على جالهم ربي قدرني نحارب لفساد و لعوج و نكشف كل لمرار لي شفتو و الاهانة و لعذاب ، كل حاجة تجي في وقتها ، و اليوم راني رايح نقدم سندويتشا للسيدين رئيس الدايرة و المير رئيس البلدية
سندويتشة بنينة لرئيس الدايرة و زميله رئيس البلدية
عمري ما شفت في كامل مدن بلادنا لجزاير مدينة فوضوية ، مخلطة ، مهتكة ، مرنكة مثل مدينة بريكة والله نتمنى لوكان والـي الولاية يسمع كلامي هذا و يحقق في صحته فان هؤلاء المسؤولين يعودو يحشمو يقولو رانا مسؤلين {صحيح رايس الدايرة هذا نشط لحالة و نجر منهم بعض لمتهاونين و شحبهم }
بصح المشاكل اليوم راهي للنيــف . نتذكر وحــد لمـرة قال بوتفليقة في خطبه راني وجدت الحالة مدودة ، مالقيت منين نبدا و هذا لكلام ينطبق على بريكة barika و الآن يتفضل رئيس دايرة و رئيس البلدية و باقي لمسؤولين بأكل السندويتشة من تحضيري ، نشاالله تعجبهم !!!
رئيس دايرة و الميــر و محافظ الشرطة كلــي راهم مهمش شايفين أرصفة الشوارع ، مع احتراماتنا لهم كمسؤولين بصح رانا نستغربو شويه كي نشوفوهم جاهلين الكارثة الكبرى التي تعرفها أرصفة شوارع لمدينة مثل الشارع الرئيسي و شارع لغوالم و غيره كطريق سطيف ، الجزار قرب الشرطة و باختصار كل الارصفة صار ت ملكا لمبيعات الحوانيت و التجار لمتجولين ؟؟ المواطن المسكين و المواطنة و الاطفال معادش عندهم رصيف يمشيو عليه ؟ و السؤال وين راها الدولة لي تحمي حق المواطن ؟؟؟؟ نظن سندويتشة تكون مليحة أكثر عندما نذكر خوانا لمسؤولين بتلك المسرحية لي رانا نشوفو فيها كل يوم بطلها الشرطة و تجار الخضر المتجولين و كم هي لعبة مسلية و هم يلعبون الغميضة !!! تأتي سيارات الشرطة و أجراس البوق و تارة يحضر حتى ضابط الشرة بل حتى عميد الشرطة و يوبخون الباعة المتجولين و ينذرون من ينذرون و يحتجزون ما ملكت ايمانهم ؟ ثم فجأة بعد مرور يومين ينتشر الباعة بعرباتهم عبر الطرق و الممرات بشكل فوضوي و مكثف أكثر من قبل و ما يترتب عنه من عرقلة المرور و حوادث الاطفال و..و... ؟ لكن السؤال لي حبينا نسئلوه للسيد الوالي المحترم لماذا السلطات المحلية غير متحكمة في تنظيم الاسواق و الباعة المتجولين ؟ لماذا الاسواق المغطاة جاهزة و لها قدرة استيعاب لكنها فارغة ؟؟ حبينا نقولو للسيد الوالي بأن السلطات المحلية أصبح مايهمهاش تنيظم لمدينة أو اعطاء صورة مشرفة لهيبة الدولة !! من جهة أخرى حبينا نقول للسيد الوالي المحترم بأنه عندما تسقط الامطار حتى و لو كانت قليلة فان المياه تتجمع بشكل كبير هنا و هناك عبر معظم الطرق و الشوارع مشكلة شبه بر ك تدوم لعدة أيام و السؤال المطروح يا سيدي الوالي لماذا البلدية لا تلاحق الشركات أو الاشخاص الذين أشرفو على تعبيد الطرق بطريقة لا تخضع للمقاييس و المعايير الهندسية ؟؟ فالمفروض أن السيد رئيس الدايرة أو المير بمجرد أن يرى تلك الانخفاضات التي تسببت في حجز المياة بشكل يعرقل المرور يطلب مراجعة عمل الشركة التي أشرفت على تعبيد الطرق ؟؟ و لا بأس يا سيدي الوالي أن أعطيك أمثلة لكي تسمعني لأن هؤلاء مراهمش رايحين يسمعو ملاحظات و احتجاجات المواطنين ، قلت نعطي أمثلة للسيد الوالي باش ما يقدروش يكذبو كي يواجهم بالدليل ؟ 1- مفترق الطرق بجوار محطة بنزين ميساوي أي طريق لور حيث يتجمع فيه الماء بشكل كارثي 2- مفترق طريق مقرة و يا له من مأساة أثناء سقوط الامطار 3- طريق الجزار 4 الخرجة نتاع طريق مقرة 6- جهات الدرناني طبعا هذا المشكل لا علاقة له بالبالوعات باش ما يغلطوناش المسؤلين المحليين لأن قضية البالوعات و قنوات الصرف التي لا تستوعب أثناء سقوط الامطار ذاك شيء أخر فنحن نتحدث عن عدم انجاز بعض الطرق المعبدة بطريقة سليمة مما انجر عنها عيوب تجمع المياه مشكلا بركا تدوم أياما طويلة و الضحية هو المواطن و المتهاون هو ذاك المسؤول الذي لا يتابع انجاز المشاريع التي تنفق فيها أموالا كبيرة ؟؟ راني مزلت نتذكر وحد الانسان مثقف تلاقيت معاه في دار الثقافة انتاع سطيف قالي بأن في الدول المتطورة لوكان يفوت محامي على الرصيف و مايلقاش منين يفوت فانه يرفع دعوة باسم الحق العام ؟؟ !! بصح راني نشوف في بريكة عشرات بل مئات المحامين و حتى السيد المحترم وكيل الجمهورية أو السيد المحترم رئيس المحكمة و السيد محافظ الشرطة و رئيس البلدية يمرون يوميا عبر شوارع المدينة و قد لا حظوا كيف صارت الارصفة ملكا لأصحاب المحلات و بائعي الخضر المتجولين و حرمان المواطن و الاطفال و النساء من السير على الرصيف خصوصا أثناء الامطار ، للأسف و لا واحد من سيادتهم حرك ساكنا ؟ الظاهر كل واحد يقول تخطي راسي ، معندو ما دخلني ؟؟ وعلاش المواطنين الاوربين لي راهم رايحين يروحو للنار ! ما يسكتوش على الباطل و لو يلكلفهم حياتهم بينما حنا لي رانا ريحين روحو للجنة ! نسكتو على لباطل ؟؟؟!!! نظن سندويتشة راهي بنينة خصوصا اذا زدنا قلنا للسيد الوالي المحترم بأن السلطات المحلية في واد و النظافة لي تتعلق بصحة المواطن في بريكة في واد أخر و مجرد زيارة لحي 200 و حي لجامبيار و حي 1000 سكن و الاحياء المطلة على الســد سنعرف مدى التهاون و اللامبالاة من طرف المسؤولين بدليل أن مأسي التيفوئيد الذي حصد الارواح أحصائياته موثقة بادارة مستشفى بريكة ؟؟ سيادة الوالي نرجوك متستغربش اذا قلنا لسيادتكم بأن المسؤولين المحليين عمرهم ما طلبوا من المواطنين و أصحاب المحلات ضرورة دهـن و تزيين واجهات محلاتهم ، عمرهم ما دارو أو شجعو على اجراء مسابقات أحسن واجهة ، أحسن حي نظيف ، أحسن مطعم ، مقهى ، بيزيريا .....
سيدي الوالي هناك حاجة خطيرة جدا لو سيادتك تحقق فيها بطريقتك الخاصة فانكم بلا شك ستكتشفون جرائم كارثية ألا و هي من هب و دب يفتــح سونــدا في بيتوا أو في المقهى نتاعو أو في الحمام نتاعو أو في المسجد نتاعو أو في الحديقة نتاعو أو في لافاج نتاعو بطريقة سرية {اما بتواطؤ السلطات أو في غفلة منها } و دون ترخيص أو مراعاة الشروط و المقاييس و ما يسمح به القانون و لاشك شيء كهذا يعد جريمة في حق الاجيال القادمة التي نعبث بثرواتها المستقبلية .
نظن خلاصت سندويتشة
من يريد التنفس مع المجنون
انه مجروح
يتبع

المصدر [ندعوك للتسجيل في المنتدى أو التعريف بنفسك لمعاينة هذا الرابط]

انها نقطة من فيض
نسال الله ان تتغير الاحوال و لا تكون الا بتغيير الجذري الدي يبدا من انفسنا
اقبلي تحياتي اختي مريم